logo
19 Желтоқсан

ЗАҢСЫЗ СЫЙАҚЫ АЛУҒА ЖОЛ БЕРМЕУ ТАҚЫРЫБЫНДАҒЫ ЖИНАЛЫС

12 желтоқсанда «Astana Venue Management» ЖШС қызметкерлерінің қатысуымен «Басқа тұлғалардың пайдасына жасалған әрекеттері (әрекетсіздігі) үшін материалдық сыйақы, сыйлықтар немесе қызметтер алу фактілерін анықтау» тақырыбында жиналыс өткізілді.

Серіктестіктің комплаенс-офицері Д.А. Якупов басқа тұлғалардың пайдасына жасалған әрекеттері (әрекетсіздігі) үшін сыйақы, сыйлықтар немесе қызметтер алу қылмыстық жазаланатын әрекет болып табылатынын және заңмен қудаланатынын қайта түсіндірді.

Атап айтқанда, Қылмыстық кодекстің 366-бабында мыналар көзделген:

  1. Мемлекеттiк функцияларды орындауға уәкiлеттiк берілген адамның не оған теңестiрiлген адамның немесе жауапты мемлекеттiк лауазымды атқаратын адамның не лауазымды адамның, сол сияқты шет мемлекеттiң немесе халықаралық ұйымның лауазымды адамының пара берушiнiң немесе ол бiлдiретiн адамдардың пайдасына жасаған әрекеттерi (әрекетсiздiгi) үшiн, егер мұндай әрекеттер (әрекетсiздiк) осы адамның қызметтiк өкiлеттiктерiне кiретiн болса немесе ол өзiнiң лауазымдық жағдайына байланысты осындай әрекеттерге (әрекетсiздiкке) ықпал ете алса, сол сияқты жалпы қамқорлығы немесе салғырттығы үшiн өзiне немесе басқа адамдарға ақша, бағалы қағаздар, өзге де мүлiк, мүлiкке құқық немесе мүлiктiк сипаттағы пайда түрiнде тiкелей өзi немесе делдал арқылы пара алуы – белгiлi бiр лауазымдарды атқару немесе белгiлi бiр қызметпен айналысу құқығынан өмiр бойына айыра отырып, мүлкi тәркiленiп, параның жиырма еселенген сомасынан елу еселенген сомасына дейiнгi мөлшерiнде айыппұл салуға не бес жылға дейiнгi мерзiмге бас бостандығынан айыруға жазаланады.

  2. Осы баптың бiрiншi бөлiгiнде көзделген, айтарлықтай мөлшерде жасалған әрекеттер, сол сияқты заңсыз әрекеттерi (әрекетсiздiгi) үшiн пара алу – белгiлi бiр лауазымдарды атқару немесе белгiлi бiр қызметпен айналысу құқығынан өмiр бойына айыра отырып, мүлкi тәркiленiп, параның елу еселенген сомасынан алпыс еселенген сомасына дейiнгi мөлшерiнде айыппұл салуға не үш жылдан жеті жылға дейiнгi мерзiмге бас бостандығынан айыруға жазаланады.

  3. Осы баптың бiрiншi, екiншi бөлiктерiнде көзделген әрекеттер, егер олар:

  1. бопсалау жолымен;

  2. адамдар тобының алдын ала сөз байласуымен;

  3. iрi мөлшерде;

  4. бiрнеше рет жасалса, – белгiлi бiр лауазымдарды атқару немесе белгiлi бiр қызметпен айналысу құқығынан өмiр бойына айыра отырып, мүлкi тәркiленiп, параның алпыс еселенген сомасынан жетпiс еселенген сомасына дейiнгi мөлшерiнде айыппұл салуға не жеті жылдан он екі жылға дейiнгi мерзiмге бас бостандығынан айыруға жазаланады.

  1. Осы баптың бiрiншi, екiншi немесе үшiншi бөлiктерiнде көзделген әрекеттер, егер оларды қылмыстық топ жасаса, сол сияқты аса iрi мөлшерде жасалса, – белгiлi бiр лауазымдарды атқару немесе белгiлi бiр қызметпен айналысу құқығынан өмiр бойына айыра отырып, мүлкi тәркiленiп, параның жетпiс еселенген сомасынан сексен еселенген сомасына дейiнгi мөлшерiнде айыппұл салуға не он жылдан он бес жылға дейiнгi мерзiмге бас бостандығынан айыруға жазаланады.

Осыған байланысты, тауарларды, жұмыстарды немесе қызметтерді жеткізушілер, сондай-ақ алаңдарды жалға алушылар сияқты жұмыс істеп тұрған немесе әлеуетті контрагенттерден сыйлықтар немесе қызметтер алуға жол берілмейді. Бұл ретте бұл сыйлықтардың сыйға тартушылардың пайдасына нақты әрекеттер үшін берілетіні немесе алдағы мереке күндеріне дәстүрлі сыйлықтар ретінде ұсынылатыны маңызды емес.

Талқылау соңында сыбайлас жемқорлыққа қарсы қызметтің комплаенс-офицері Д.А. Якупов сыбайлас жемқорлыққа қарсы заңнама талаптарының тиісінше орындалуына байланысты барлық мәселелер бойынша кеңес беруге дайын екенін еске салды.